"يوميات واحد مش فاضي "فيكشن

الساعة ستة ونص الصبح: بتقوم من النوم غصبن عنك عشان تروح عالشغل غصبن عنك

الساعة ستة ونص وتلت دقايق: بترجع تنام خمس دقايق بتصحى بعدها بتلت ارباع الساعة زي المجنون اللي طلعلو الجن الأزرق وبتنط بالشاور (لإنك بتحب النضافة) ولإنو المي بتصحي القرود، بتحلق وبتلبس اللي عالحبل وبوجهك عالدوام

الساعة تسعة وعشرة بتفوت عالشغل زحف عشان ما حدا يعرف إنك متأخر (زي كل

يوم) بس (زي كل يوم) بيشوفوك

عالكاميرا وبيخبّروا عنك وبيخصموا من راتبك وإنته زي السطل مفكر حالك ذيب

الساعة طنعش بتبلش معدتك تتظاهر لإنك (زي كل يوم) ما بتفطر ببيتكم فبتصير تدور بالجوارير على أي إشي تسلي فيه حنكك، بتلاقي حبة شكلاطة بس لإنك جنتلمان (زي ما قلنا القصة فيكشن) بتعطيها لزميلتك اللي بتشبه فلونة، بس اللي ما بتعرفو حضرة جنابك هو إنو زميلتك فلونة بتحكي إنك بتشبه عبسي فهيك بتطلعوا خالصين

الساعة وحدة بتهرّ من الجوع و بيزغللو عيونك وبتصير تتفلّت عشان تطلع تتسمم

الساعة وحدة ونص بترجع عالدوام (طبعاً زحف زي الصبح) و كأنه أبو زيد خالك لإنك ضحكت على المجتمع الدولي وطلعت أكلت..مش بس هيك..وشربت كوكتيل كمان

الساعة وحدة ونص و خمسة بتصفرن وبتوقع عالأرض وبيحملوك عالمستشفى وبتطلع متسمم من الشاورما اللي تسممتها

الساعة تلاتة وتلت بييجي مسؤول يزورك وبيصوروه بالتلفزيون وهو بيطمّن على

حضرة جنابك و إنته منسدح بالتخت

الساعة ستة ونص بييجي مديرك وزملاءك يزوروك وبيبشرك مديرك إنهم قرروا يزيدوا راتبك ويرَفعوك ويعطوك إجازة أسبوع نقاهة

الساعة سبعة بييجوا أهلك زي المصاريع بعد ما شافتك جارتكم

عالتلفزيون وفضحت سماك بالحارة لإنك كنت توبلس ومادين منك برابيش

الساعة سبعة ونص بيسمحلك الدكتور تروّح مع أهلك وبيعطيك دوا للتسمم

الساعة تمنية بتطلع مرة تانية عالتلفزيون والمسؤول عم بيزورك..وبيقرروا إنك طلعت مش متسمم و إنما معك مرض مزمن و إنته ما معك خبر...مبروك